मकवानपुरमा बदर मत बढ्यो : २०७९ भन्दा २०८२ मा प्रत्यक्षतर्फ बढी

संख्या र प्रतिशतका हिसाबले मकवानपुर २ मा सबैभन्दा धेरै मत बदर भएको छ । यस क्षेत्रमा ९१ हजार ११६ मत खसेकोमध्ये पाँच हजार ४९७ मत अर्थात् ६.३ प्रतिशत बदर भएको छ । २०७९ को निर्वाचनमा भने यहाँ ४.७६ प्रतिशत मत बदर भएको थियो । यस आधारमा यसपटक बदर मतको प्रतिशत बढेको देखिन्छ ।

यस्तै मकवानपुर १ मा ९५ हजार ८४३ मत खसेकोमध्ये पाँच हजार ११८ मत अर्थात् ५.३३ प्रतिशत बदर भएको छ । अघिल्लो निर्वाचन २०७९ मा यस क्षेत्रमा ४.४६ प्रतिशत मत बदर भएको थियो । यसपटक यहाँ पनि बदर मतको प्रतिशत बढेको बागमती प्रदेश निर्वाचन कार्यालय हेटौँडाका प्रमुख हरिप्रसाद ढकालले बताए ।

प्रत्यक्षतर्फ मकवानपुर १ मा २१ जना र मकवानपुर २ मा २३ जनाले उम्मेदवारी दिएका थिए । तीमध्ये दुवै क्षेत्रमा गरी ३५ जना उम्मेदवारको धरौटी जफत भएको छ । निर्वाचन कानुनअनुसार कुल सदर मतको १० प्रतिशत मत ल्याउन नसक्ने उम्मेदवारको धरौटी जफत हुने व्यवस्था छ। समानुपातिकतर्फ भने प्रत्यक्षको तुलनामा बदर मत कम देखिएको छ । मकवानपुर १ मा तीन हजार ८८७ मत अर्थात् ३.५१ प्रतिशत बदर भएको छ भने ९३ हजार ७१ मत सदर भएको छ ।

मकवानपुर २ मा चार हजार ७० मत अर्थात् ४.४३ प्रतिशत बदर भएको छ । दुवै क्षेत्र गरी समानुपातिकतर्फ सात हजार ४४७ मत अर्थात् ३.३९ प्रतिशत मत बदर भएको निर्वाचन कार्यालयले जनाएको छ । तर, समानुपातिकतर्फ भने २०७९ को निर्वाचनमा बदर मतको प्रतिशत यसपटकभन्दा बढी थियो । त्यतिवेला मकवानपुर १ मा ६.९३ प्रतिशत र मकवानपुर २ मा ४.८५ प्रतिशत मत बदर भएको थियो ।