हेटौँडालाई महिलामैत्री र जलवायु प्रतिरोधी शहर निर्माणका लागि सम्झौता
संवाददाता
हेटौँडालाई महिलामैत्री र जलवायु प्रतिरोधी शहरको रूपमा विकास गर्न सम्झौता भएको छ ।
हेटौँडा उपमहानगरपालिका र संयुक्त राष्ट्रसङ्घीय परियोजना सेवा कार्यालय यसएनओपिएसबिच ‘सिटीज फर वुमनः नेपालमा समावेशी र जलवायु प्रतिरोधी शहरीकरण’ परियोजना अन्तर्गत परियोजना सहयोग सम्झौतामा हस्ताक्षर भएको हो ।
सम्झौता अनुसार युएनओपिएसले उपमहानगरपालिकालाई १ लाख ८४ हजार अमेरिकी डलर बराबरको आर्थिक सहयोग उपलब्ध गराउनेछ ।
परियोजना कार्यान्वयनका लागि हेटौँडा उपमहानगरपालिकाले उक्त रकमको ३० देखि ५० प्रतिशतसम्म लागत साझेदारी गर्नेछ ।
‘सिटीज फर वुमन’ परियोजनाको मुख्य उद्देश्य तीव्र शहरीकरण र बढ्दो जलवायु जोखिमले सिर्जना गरेका चुनौतीहरूलाई सामना गर्नु हो ।
यसका लागि लैंगिक उत्तरदायी र जलवायु प्रतिरोधी सार्वजनिक खुला स्थानहरूको योजना, डिजाइन र निर्माणमार्फत नगरपालिकाहरूलाई सहयोग गरिनेछ ।
सो परियोजना युरोपेली सङ्घ र सुओमी फिनल्याण्डको आर्थिक सहयोगमा युएनओपिएस, युएन– हाविटाट र सिटिज एलायन्सद्वारा संयुक्त रूपमा चार वर्षको अवधिमा कार्यान्वयन गरिनेछ ।
हस्ताक्षर कार्यक्रममा बोल्दै नगरप्रमुख मीना कुमारी लामाले यो सम्झौताले स्थानीय सरकारका योजनाहरूमा समावेशी र जलवायु प्रतिरोधी शहरी विकासलाई प्रवर्द्धन गर्ने विश्वास व्यक्त गरिन् ।
उनले सो परियोजनाले महिला र अन्य संवेदनशील समुदायहरूलाई नगर योजना प्रक्रियामा सशक्त रूपमा सहभागी गराउन अवसर सिर्जना गर्ने अपेक्षा राखिन् ।
