विपद् प्रभावितलाई राहत र पुनर्स्थापनाका लागि बागमतीका ७ मन्त्रालयलाई जिम्मेवारी

मनसुनजन्य विपद्को व्यवस्थापन तथा राहत र पुनर्स्थापनाका लागि बागमती प्रदेशका ७ विषयगत मन्त्रालयलाई जिम्मेवारी दिएको छ ।

बैठकले मनसुन पूर्ण रूपमा नबाहिरिएकोले सम्भावित जोखिम न्यूनीकरणका लागि सबै निकायलाई उच्च सतर्कतामा रहन निर्देशन दिएको छ ।

जसअनुसार भौतिक पूर्वाधार विकास मन्त्रालयलाई नेपाली सेना, प्रहरी, स्थानीय तह र निजी क्षेत्रसँगको समन्वयमा प्रदेश राजमार्ग अन्तर्गतका अवरुद्ध सडकहरू तत्काल सुचारु गर्न भनिएको छ भने कृषि तथा पशुपन्छी विकास मन्त्रालयले कृषिबाली र पशुचौपायाको क्षतिको तथ्याङ्क सङ्कलन गरी आवश्यक राहतको व्यवस्था मिलाउने जिम्मेवारी प्रदान गरिएको छ ।

सामाजिक विकास मन्त्रालयले प्रदेशभित्रका विद्यालयहरूमा भएको क्षतिको विवरण सङ्कलन गरी तत्काल मर्मत सम्भारको काम गर्न, खानेपानी, ऊर्जा तथा सिँचाइ मन्त्रालयलाई खानेपानीबाट प्रभावित परिवारको पहिचान गरी तत्काल आपूर्तिको व्यवस्था गर्न, स्वास्थ्य मन्त्रालयलाई घाइतेहरूको निःशुल्क उपचारका लागि आवश्यक चिकित्सकीय टोली, औषधि तथा उपकरणको प्रबन्ध गर्न निर्देशन दिइएको छ ।

उद्योग, वाणिज्य भूमि तथा प्रशासन मन्त्रालयले प्रभावित क्षेत्रमा खाद्यान्न लगायतका अत्यावश्यक वस्तुको सहज आपूर्तिको व्यवस्था मिलाउने, वन तथा वातावरण मन्त्रालयले जोखिममा परेका जलाधार र बस्तीहरूको क्षति सङ्कलन गरी संरक्षणका लागि आवश्यक कार्य प्रारम्भ गर्ने निर्णय बैठकले गरेको छ ।