निर्वाचनमार्फत स्थायित्व र विकासको यात्रामा अघि बढ्नुपर्छ : मुख्यमन्त्री बानियाँ

बागमती प्रदेशका मुख्यमन्त्री इन्द्रबहादुर बानियाँले ‘जेनजी’ प्रदर्शन पछिको अन्योललाई चिर्दै आगामी निर्वाचनमार्फत देशलाई स्थायित्व र विकासको बाटोमा लैजानुपर्ने बताएका छन् । उनले सङ्घीय अन्तरिम सरकारले घोषणा गरेको आगामी फागुन २१ गतेको प्रतिनिधिसभा निर्वाचनलाई सफल बनाउन सबै राजनीतिक दल, प्रशासन र सुरक्षा संयन्त्र एकजुट हुनुपर्ने आवश्यकता औँल्याए ।

संविधान दिवस तथा राष्ट्रिय दिवस २०८२ को अवसरमा शुक्रबार हेटौँडामा आयोजित कार्यक्रममा बोल्दै मुख्यमन्त्री बानियाँले शान्ति, सुव्यवस्था, स्थायित्व र समृद्धिको यात्रामा अगाडि बढाउन सबैको भूमिका अपरिहार्य रहेको बताए ।

उनले प्रदेश सरकार मितव्ययी बन्दै सुशासन प्रत्याभूत गराउन केन्द्रित भएको समेत बताए । संविधान प्रदत्त सङ्घीय शासन प्रणालीलाई प्रभावकारी र जनमुखी तवरले सञ्चालन गर्नु प्रदेश सरकारको दायित्व रहेको बताए । प्रदेश सरकारलाई मितव्ययी र नागरिकलाई अधिकतम सेवा सुविधा प्रदान गर्न फजुल खर्च कटौती गर्ने प्रक्रिया सुरु भइसकेको उनले दाबी गरे ।

‘ताजा जनादेशमार्फत् शान्ति र विकासको यात्रा अगाडि बढाउनु अपरिहार्य छ । यसमा सबैको सहकार्य अनिवार्य रहन्छ’ उनले भने( ‘सरकारी निकायहरूबाट प्राप्त गरिने सेवा प्रवाहलाई अझ चुस्त, दुरुस्त, पारदर्शी बनाउन सङ्कल्पसहित बागमती प्रदेश सरकार क्रियाशील छ । प्रदेश सभाबाट पारित सङ्कल्प प्रस्ताव बमोजिम बजेट तर्जुमा प्रणालीमा सुधार गरी स्रोत साधनको वितरणलाई सन्तुलित बनाइनेछ । डिजिटल युग र नयाँ पुस्ताको सोच बमोजिम सेवा प्रवाह र निर्णय प्रक्रियालाई छिटो, छरितो र परिणाममुखी बनाई जनतालाई सुशासनको प्रत्याभूति दिलाउने गरी प्रदेश सरकारका काम कारबाही अगाडि बढ्नेछ ।’

सम्बोधनका क्रममा उनले सुशासनको माग राख्दै भएको ‘जेनजी’ पुस्ताको प्रदर्शनमा घाइतेहरूको उपचारको प्रबन्ध प्रदेश सरकारले मिलाउने र प्रदर्शनका क्रममा क्षतिग्रस्त सार्वजनिक तथा निजी संरचनाको पुननिर्माणलाई प्राथमिकता दिने प्रतिबद्धता समेत व्यक्त गरे ।