साबिक विजेता मच्छिन्द्र बागमती गोल्डकपको फाइनलमा
संवाददाता
साबिक विजेता मच्छिन्द्र क्लब ७औँ संस्करणको बागमती गोल्डकपको फाइनलमा प्रवेश गरेको छ । मकवानपुरको बागमती गाउँपालिका–४ स्थित सहिद स्मृति रंगशालामा जारी प्रतियोगिताको दोस्रो क्वाटरफाइनल खेलमा शनिबार जितत निकाल्दै मच्छिन्द्रले चर्च ब्वाइजसँगको उपाधि भिडन्त पक्का गरेको छ ।
मच्छिन्द्रले चौथो संस्करणको विजेता टोली थ्री स्टार क्लबलाई ३–१ गोलले हराउँदै चर्च ब्वाइजसँगको उपाधि भिडन्त पक्का गरेको हो । मछिन्द्रको जितमा शिशिर लेखी, समिराज थोकर, र विदेशी खेलाडी स्टेफेनले एक एक गोल गरे ।
यस्तै, थ्री स्टारका लागि विदेशी खेलाडी एलेक्स विलियम्सले एक गोल गरे । खेलमा सुरुवाती अग्रता भने थ्री स्टारले बनाएको थियो । खेलको पहिलो हाफको ३७औँ मिनेटमा विदेशी खेलाडी एलेक्सको गोलबाट थ्री स्टारले अग्रता बनाएको थियो ।
तर, सम्हालिएर खेल्न नसक्दा थ्री स्टारले पहिलो हाफको ४२औँ मिनेट र दोस्रो हाफको छैठौं र ३७औं मिनेटमा गोल व्यहोर्न बाध्य भयो । खेलको म्यान अफ द म्याच मच्छिन्द्रका देवेन्द्र तामाङ घोषित भए । उनले १० हजार रुपैयाँ प्राप्त गरे ।
अब, विजेता टोलीले उपाधिका लागि सोमबार चर्च ब्वाइज युनाइटेडसँग प्रतिस्पर्धा गर्नेछ । यसअघि शुक्रबार भएको पहिलो सेमिफाइनल खेलमा विभागीय टोली एपिएफलाई ३–२ गोलले हराउँदै चर्च ब्वाइज प्रतियोगिताको फाइनलमा प्रवेश गरिसकेको छ ।
सोमबार हुने फाइनल खेलको विजेताले १० लाख र उपविजेताले ५ लाख प्राप्त गर्नेछन् । यस्तै, प्रतियोगिताको सर्वोत्कृट खेलाडीलाई एक लाख एक हजार तथा विधागत उत्कृष्ट खेलाडीलाई जनही २५–२५ हजार रुपैयाँ प्रदान गरिने आयोजकले जनाएको छ।
