निकुञ्जको सुरक्षार्थ खटिएका सेनाले चलाएको गोली लागेर मर्‍योे जंगली हात्ती 

जंगली हात्तीले स्विपङ गरेर निकुञ्जको कोर एरियामा पठाउने क्रममा बुधबार कुमरोज मध्यवर्ती सामुदायिक वनको  लामिताल क्षेत्रमा घटना भएको चितवन राष्ट्रिय निकुञ्जका सूचना अधिकारी अविनाश थापामगरले बताए । ‘लामिताल क्षेत्रमा जंगली हात्ती (मकुना) अकस्मात् फेला परेर घरपालुवा हात्ती (चुरेगज) लाई सीधै आक्रमण गर्न आयो । दुई राउन्ड वार्निङ हवाई फायर गर्दा पनि हात्ती भागेन,’ मगरले भने, ‘उल्टै सानो हात्ती खगेन्द्रप्रसादमा सवार रेन्जर श्याम तामाङ हात्तीबाट खस्नुभयो । ज्यानको सुरक्षा गर्न फेरि तीन राउन्ड फायर गर्दा पनि जंगली हात्ती फेरि फर्किएर आक्रमण गर्न आएपछि गोली चलाउनुपरेको हो ।’

हात्तीको दाहिनेपट्टि घाँटीमा गोली लागेर मृत्यु भएको पोस्टमार्टम रिपोर्टमा उल्लेख छ । राष्ट्रिय निकुञ्ज तथा वन्यजन्तु संरक्षण ऐन, २०२९ को दफा २१ अनुसार निकुञ्ज सुरक्षार्थ खटिएको सेनाले आत्मसुरक्षाका लागि गोली चलाउन पाउँछ । मकुना गत असोजमा सौराहाआसपासको क्षेत्रमा गाउँबस्तीमा पसेको थियो । कोर एरियामा पठाउन निकुञ्ज सौराहा सेक्टरका कर्मचारी तथा निकुञ्ज सुरक्षार्थ खटिएको नयाँ गोरख गण (क) गुल्म सौराहाका नेपाली सेनाको संयुक्त टोलीले ५–६ वटा हात्तीबाट दैनिक रूपमा स्विप गर्ने र कोर इलाकातर्फ धपाउने काम गरिरहेको थियो ।

मन्त्रालयले बनायो छानबिन समिति 
जंगली हात्तीमाथि गोली चलाइएको विषय र आगामी दिनमा अपनाइनुपर्ने रणनीति तय गर्न वन तथा वातावरण मन्त्रालयले छानबिन समिति बनाएको छ ।

सहसचिव डा. बुद्धिसागर पौडेलको नेतृत्वमा पाँचसदस्यीय समिति बनाइएको सचिव डा. दीपक खरालले बताए । ‘समितिले सात दिनभित्र घटनास्थलको यथार्थ विवरण, विश्लेषण गर्नेछ, आगामी दिनमा सुधार गर्नुपर्ने विषय पनि समेट्ने कार्यादेश दिएका छौँ,’ सचिव खरालले भने । समितिमा राष्ट्रिय निकुञ्ज तथा वन्यजन्तु विभाग, नेपाली सेनाका प्रतिनिधि र पशु चिकित्सक छन् । सचिव खरालले  चितवनमा जनधनको क्षति हुने अवस्था आएपछि आत्मरक्षाका लागि गोली चलेको र आगामी दिनमा यस्तो अवस्था सिर्जना नहोस् भनेर पनि समितिले अध्ययन गर्ने बताए ।